• Experience the World

    Buxoro davlat universiteti

    Elektron axborot ta`lim resurslari

Adabiyotlar 622452 ta
Videodars 982 ta
Audiokitob 2205 ta

 

Vatan va vatanparvarlik haqida maqollar

Аylanasi ovuli,
Toʼgaragi toʼrkuni.

Аyrilmagin elingdan,
Quvvat ketar belingdan.


Badqavm boʼlsang boʼl,
Beqavm boʼlma.

Baliq suv bilan tirik,
Odam — el bilan.

Begona tuproq — devona tuproq.

Betkay ketar, bel qolar,
Beklar ketar, el qolar.

Birovning yurtida bek boʼlguncha,
Oʼzingning yurtingda it boʼl.

Bulbul chamanni sevar,
Odam — Vatanni.

Bulbulga bogʼ yaxshi,
Kaklikka — togʼ.

Vatan gadosi — kafan gadosi.

Vatan uchun oʼlmoq ham sharaf.

Vatan qadrini bilmagan oʼz qadrini bilmas.

Vatanga kelgan — imonga kelar.

Vatanga falokat — oʼzingga halokat.

Vatangado boʼlguncha,
Kafangado boʼl.

Vatandan yiroqlashgan — nomusdan oʼlar.

Vatani borning baxti bor,
Mehnati borning — taxti.

Vataning tinch — sen tinch.

Vatanni sotgan er boʼlmas.

Vatanning vayronasi — Umrning gʼamxonasi.

Vatanning vayronasi — Umrning hayronasi.

Vatansiz inson — kuysiz bulbul.

Dindan chiqsang ham, eldan chiqma.

Dushmanga nafrati boʼlmaganning
Vatanga muhabbati boʼlmas.

Yordan ayrilsang ham, eldan ayrilma.

Yoridan ayrilgan yetti yil yigʼlar,
Yurtidan ayrilgan oʼlguncha yigʼlar.

Yoringni gul orasidan izla,
Erkingni — el orasidan.

Yigit gʼami elida,
Elning gʼami dilida.

Kiymoqqa katan yaxshi,
Turmoqqa vatan yaxshi.

Kishi yerida sulton boʼlguncha,
Oʼz elingda choʼpon boʼl.

Kishi yurtida sulton boʼlguncha,
Oʼz yurtingda ulton boʼl.

Kishi yurtida shoh boʼlguncha,
Oʼz yurtingda gado boʼl.

Koʼlning otini baligʼi chiqarar.

Koʼrpang qaerda boʼlsa, Koʼngling shu yerda.

Non gadosi boʼlsang ham, Yurt gadosi boʼlma.

Ona yerning tuprogʼi — ona sutidan aziz.

Ona yurting — oltin beshiging.

Ona yurting omon boʼlsa,
Rangi roʼying somon boʼlmas.

Sigirning suti — tilida,
Erning quti — elida.

Sovuq urgandan qolar,
Tuproq surgandan qolmas.

Suvni bersang elga,
Yasharsan ming yilga.

Tovushqonga tugʼilgan tepasi aziz.

Tuqqan yerda tugʼing tik.

Tuqqan elga jon tortmasa ham, qon tortar.

Tugʼilgan yerdan koʼngil uzilmas,
Yurt qoʼriganning yurti buzilmas.

Tugʼilgan yering — Vataning,
Vataning — nomusing.

Toʼygan yerdan tuqqan yer yaxshi.

Ursa ham, el yaxshi,
Soʼksa ham, el yaxshi.

Fil tushida Hindistonni koʼrar.

Changal ham oʼz joyida gurillar.

Ekin yerida koʼkarar,
Er — elida.

El bor boʼlsa, er xor boʼlmas,
Er bor boʼlsa, el xor boʼlmas.

El boshiga kun tushsa,
El yaratgan er kelar.

El boshiga tushgani —
Er boshiga tushgani.

El ishini er qilur,
Er qadrini el bilur.

El-kunim boʼlmasa,
Oy-kunim tugʼmasin.

El kuyunganda kuyungan — botir,
El suyunganda suyungan — botir.

El tilagin tilagin,
Siniq koʼnglin siylagin.

El egasiz boʼlmas,
Toʼn — yoqasiz.

El qudrati — chin qudrat,
Vatan tuprogʼi — qimmat.

El qurimasa, yer qurimas.

El — qoʼngan yerda,
Ot — toʼygan yerda.

El qoʼngan yerni bilar,
Ot toʼygan yerda tinar.

El gʼamini bilgan elda doston.

Elga manzur — erga manzur.

Elga xizmat — oliy himmat.

Elga qoʼshilgan moy yutar,
Eldan ayrilgan qon yutar.

Elga qoʼshilganning koʼngli toʼq,
Eldan ajralganning beti yoʼq.

Elga qoʼshilsang, er boʼlasan,
Eldan ajralsang, yer boʼlasan.

Elda bori — senda bori.

Eldan ayrilguncha, jondan ayril.

Eliga vafo qilgan
Yoviga jafo qilar.

Elidan bezgan er oʼngmas,
Koʼlidan bezgan gʼoz oʼngmas.

Elim boshqa degan, el boʼlmas.

Eling senga choʼzsa qoʼl,
Unga doim sodiq boʼl.

Eling-yurting boʼlmasa,
Oying-kuning boʼlmasin.

Elli yer — bozor,
Elsiz yer — mozor.

Ellik yilda el yangi.

Elning baxti — erning baxti.

Elning ichi — oltin beshik.

Elning yirtigʼiga yamoq boʼl,
Uzuniga uloq boʼl.

Elning egasi boʼl,
Tobutning chegasi boʼl.

Elning gʼami — erning gʼami.

Er bolasi — el bolasi.

Er davlati — elida.

Er yigit elga tortar.

Er yigit oʼzi uchun tugʼilar,
Eli uchun oʼlar.

Eringdan bezsang ham,
Elingdan bezma.

Erning ishi — elning boʼynida,
Elning ishi — erning boʼynida.

Erning moli — elning moli.

Yurt boshiga ish tushsa,
Er yigit hozir.

Yurt egasi yoʼlbarsdir,
Oldirgani qoʼymasdir.

Yurt qoʼri, eling oʼsar,
Qoʼrimasang, uying toʼzar.

Yurt qoʼrisang, oʼsarsan,
Qoʼrimasang, toʼzarsan.

Yurtda odam boʼlmasa,
Toʼngʼiz tepaga chiqar.

Yurtdan ayrilganni yov chopar.

Yurtdan ketgan, yurtmonda.

Oʼtar hasrat, armonda.

Yurti boyning oʼzi boy.

Yurtim — koʼksim,
Elim — iligim.

Yurting omon — oʼzing omon.

Yurtni dedim, yuzga kirdim.

Yaxshi yigit yurt tuzar,
Yomon yigit yurt buzar.

Oʼz uyim — oʼlan toʼshagim.

Oʼz yurtingning qadri
Oʼzga yurtda bilinar.

Oʼz yurting — oʼlan toʼshaging,
Oʼzga yurt boʼlmas beshiging.

Oʼzbek iskab boʼlsa ham, elini topar.

Oʼzga yurtning qozisi boʼlgandan,
Oʼz elingning tozisi boʼl.

Oʼzga yurtning boshi boʼlgancha,
Oʼz yurtingning toshi boʼl.

Oʼzga yurtning gulidan,
Oʼz yurtingning choʼli yaxshi.

Oʼlsang oʼl,
Vataningda boʼl.

Oʼpkadan urgan yel yomon,
Elidan ayrilgan er yomon.

Qorongʼi qolgan yurtda
Qorashaqshaq podsho boʼlur.

Qurigan yurtga qul oqsoqol.

Qush butaga sigʼinar,
Odam — Vatanga.

Qush ham ketsa keladi,
Oʼz elini sevadi.

Har gul oʼz butasida aziz.

Har gulning oʼz isi bor,
Har elning oʼz tusi bor.

Har kim — eliga,
Oʼrdak — koʼliga.

Har kimning oʼz eli — oʼziga shirin.

Har koʼkatning oʼz suygan tuprogʼi bor.

Har toycha oʼzi suv ichgan bulogʼini maqtar.

Har elning — oʼz irimi.

Har shaharning havosi boshqa.

Har qush oʼz uyasiga qarab uchar.

Himmatli er,
Oʼz elini der.

Yangi kitoblar

Аxborot - resurs markaziga qabul qilingan yangi adabiyotlar.

  • Ishbilarmon kishilar

    Ishbilarmon kishilar

    Asli ismi Uilyam Sidney Porter (1862 - 1910) bolgan O'Genri dunyo adabiyotiga Amerikaning eng mashhur hikoyanavis adibi sifatida tanilgan. U o‘zining qisqa umri davomida sermahsul ijod qildi, uch yuzga yaqin hikoyalar yozib qoldirdi. Bu hikoyalarida O'genri Amerika hayotining rang-barang jibatlarini, inson qalbi va xarakterini turfa obrazlar timsolida turlicha bo‘yoqlarda mahorat bilan tasvirlab bera oldi. Aziz kitobxon! Mazkur kitobga kirgan O'genrining eng sara hikoyalari rus va ingliz tillaridan o’zbekchaga tarjima qilinib, hukmingizga havola etilmoqda. U sizlarga manzur bo’ladi degan umiddamiz.

    Read more

  • Gulliverning sayohatlari

    Gulliverning sayohatlari

    Jonatan Svift 1667- yil 30-noyabrda Irlandiyaning Dublin shahrida, o‘rtahol oilada dunyoga kelgan 1745-yil 19-oktabrda 77 yoshida Dublinda vafot etgan. U ingliz-irlandiya hajviy asarlar yozuvchisi, jamoatchi, faylasuf, shoir, jamoat arbobi sifatida tanilgan. Tirishqoq va mohir Jonatan Sviftning ko'pgina asarlari irlandiyaliklar tarafidan hurmat va ehtirom bilan qabul qilingan. Ayniqsa, uning ,,Gulliverning sayohatlari“ nomli mashhur fantastik asari keng ommaga tezda tarqaldi. Dunyoning ko‘pgina mamlakatlarida sevilib o‘qiladigan mazkur asar juda ko‘p marta ekranlashtirilgan. Kitob keng kitobxonlar ommasi uchun mo'ljallangan.

    Read more

  • Har kimki vafo qilsa

    Har kimki vafo qilsa

    O‘zbek xalqi ko'plab buyuk daholarga beshik tebratgan millat. O‘zbekning asl farzandi, shoh va shoir, zukko olim Zahiriddin Muhammad Bobur ana shunday daholardan biridir. U nafaqat o‘z diyorimizda, balki butun dunyoga ham ma’lum-u mashhurdir. Bobur tadbirkor podshoh, mohir sarkarda sifatida Boburiylar sulolasiga asos solgan bo‘lsa, iste’dodli shoir, adib sifatida adabiyot xazinasini o‘zining o‘lmas va sara asarlari bilan boyitdi. Bizgacha uning “Boburnoma”dan tashqari juda ko‘p g'azal, ruboiy, qit'a va fardlari yetib kelgan. Qo‘lingizdagi kitobda Bobur she’riyatining eng go‘zal namunalari jamlangan bo‘lib, unda insoniy fazilatlar, yor vasli, uning go'zalligi, unga cheksiz muhabbat, hijron azobi, ayriliq alamlari nihoyat go‘zal va mohirona ifoda etilgan.

    Read more

  • Shum bola

    Shum bola

    Asarda XX asrdagi xalqimizning turmush tarzi, ikkinchi jahon urushi ta’siri, o‘zbek xalqining azaliy urf-odatlari tasvirlangan. Aziz kitobxon, o'ylaymizki, siz ularni o‘qib, qalbingiz zavqqa to‘ladi, shu bilan birga, XX asr millat tumushidan xabardor bo‘lasiz. Asarni sabot bilan o'qing, xalqimiz tarixini, adabiyotini chuqur o’rganing, kerakli mushodalar chiqaring. Bu yo'lda sizga zafarlar tilab qolamiz.

    Read more

  • Mening o`g`rigina bolam

    Mening o`g`rigina bolam

    G‘afur G'ulom asarlarini o‘qir ekanmiz, unda oddiy xalq turmushi va ruhi bilan birga yashayotgan yozuvchi ko‘z o'ngimizda gavdalanadi. «Mening o‘g‘rigina bolam» nomi ostida jamlangan qissalar va hikoyalar o'zbekona hayot tarzi, insonlardagi mehr-oqibat kabilarning qimmatli ne’mat ekanligini anglaydi. Taqdir boshlagan ko'chalarning so‘qmoqlaridan bir-bir o‘tib, unda o‘z yaqinlarini ko'rgandek boladi. O'zbek xalqining necha asrlardan beri meros bo’lib kelayotgan urf-odatlari ichidan eng qadrlisi - mehmondo'st xalqni ko'radi. G‘afur G’ulom asarlarini sahna orqali tanigan kitobxon do'stlarimiz endi adib asarlarining asl mohiyati bilan tanishadilar.

Interaktiv xizmatlar

Buxoro davlat universitetining interaktiv xizmatlari.

O`JQQT

O`quv jarayonini qo`llab quvvatlovchi tizim

Moodle

Moodle masofaviy o`qitish tizimi

E-hujjat

Elektron hujjat aylanish tizimi