• Experience the World

    Buxoro davlat universiteti

    Elektron axborot ta`lim resurslari

Adabiyotlar 622452 ta
Videodars 982 ta
Audiokitob 2205 ta

 

Halollik va tekinxoʼrlik haqida maqollar

Beli ogʼrimaganning non yeyishini koʼr.

Bersang — yeydi, ursang — oʼladi.

Bir dehqon omoch bilan,
Yettovlon choʼmich bilan.


Birovning qoʼli bilan tikan yulish oson.

Davlat*ning illati bor.

Dili pokning ishi — pok.

Dili pokning yoʼli — pok.

Yerga boqqan ish qilmas,
Ish qilsa ham, tinch qilmas.

Ishlab yegan zogʼorang
Tanangga yogʼdek yoqar.

Ishlab topganning oshi — lazzatli.

Ishlagan er, tishlab yer.

Ishlamay yegan ogʼrimay oʼlar.

Kambagʼalning puli — peshona teri.

Kim ishlaydi, kim tishlaydi.

Kishining zari kishini buzar,
Zarni koʼrgan zanjirini uzar.

Koʼngil tortgan osh — halol.

Manglay tering bilan topilgan mol,
Taningga halol.

Oshing halol boisa, koʼchada ich.

Oqar suvning haromi yoʼq.

Ogʼzingdan chiqqan tupruk,
Yerga tushsa, makruh.

Ogʼiz yesa, koʼz uyalar.

Pora doʼzax eshigini ochar,
Oʼzini bilgan undan qochar.

Pora yegan pona yer.

Pora kanda boʼlmasa,
Parokanda boʼlasan.

Poraxoʼr boyimas,
Oʼgʼri koyinmas.

Poraxoʼr besh qoʼlini ogʼziga tiqar.

Poraxoʼr — tekinxoʼr.

Poraxoʼr — haromxoʼr.

Poraxoʼrning koʼzi beshta,
Qoʼli — toʼrtta.

Poraxoʼrning tavbasidan qoʼrq,
Mugʼombirning — yigʼisidan.

Tekin boʼlsa, mix yut.

Tekin goʼshtning suyagi burun yirtar.

Tekin yegan — koʼzga tikan.

Tekin yeguncha, ekib ye.

Tekin yema, teshadi,
Sim boʼlsang ham, eshadi.

Tekin tomoq odamning tuzogʼi,
Yedirib aytadi: Аmmamning buzogʼi.

Tekin tomoq tish sindirar.

Tekin tomoq totlik kelar.

Tekin tomoqning taʼmi boshqa,
Yeganlarning boshi qashqa.

Tekin tomoqning tikanagi tiqilar.

Tekin topgan mol yomon,
Oxiri qoʼymas omon.

Tekin toʼn qimmatga tushar.

Tekindan tomoq boʼlsa,
Qirq kun yotmoq kerak.

Tekinning minnati koʼp,
Mehnatning — ziynati.

Tekinxoʼr boyimaydi,
Boyisa ham yuqmaydi.

Tekinxoʼr soyasidan qoʼrqar.

Tekinxoʼr — suvsiz ariq.

Tekinxoʼr qopib yeydi,
Mehnatkash topib yeydi.

Tekinxoʼrga teng kelma, qopadi,
Oʼz aybini tekin pulga yopadi.

Tekinxoʼrga shafqat yoʼq.

Tikanning zahri yomon,
Tekinxoʼrning qahri yomon.

Tomogʼining yoʼli toza,
Ishi boʼlar pokiza.

Totli tomoq tamuqqa tushirar.

Uzum tilaganga uzib-uzib ber,
Qovun tilaganga — qon yalatib.

Xalq molini yegan halqumidan ilinar.

Sharob tekin boʼlsa, hamma ichar,
Tekinxoʼr vijdonidan kechar.

Shirafurushning shirasi bor,
Ortish-tortish kirasi bor.

Ekkanda yoʼq,
Tikkanda yoʼq,
Xirmonda hozir.

Eldan osh yesang, elga osh ber.

Eshak Makkaga borib halol boʼlmas.

Eshakning goʼshti harom,
Mehnati — halol.

Yulgʼich borning molin yulqar,
Yoʼqning nomin bulgʼar.

Yulgʼich yuladi,
Yulib olgach, koʼmadi.

Yulgʼich yulib toʼymas.

Yulgʼich yulib toʼymaydi,
Qirgʼich qirib qoʼymaydi.

Oʼroqda yoʼq,
Mashoqda yoʼq,
Xirmonda hozir.

Oʼzi oʼlgan qoʼy qurbonlikka kirmas.

Halol ish — lazzatli yemish.

Halol ishla, halol tishla.

Halol mehnat yerda qolmas.

Halol mehnat — moʼl daromad.

Halol molning qulfi oʼzida boʼlar.

Halol pishib chiqar,
Harom teshib chiqar.

Harakating erta boʼlsa,
Kuzda erta oʼrasan.

Mehnatingni halol qilsang,
Huzurini koʼrasan.

Harom yegin toʼyguncha,
Kaltak yegin oʼlguncha.

Harom ish tez qaritar.

Harom haromni chaqirar.

Haromdan kelgan haromga ketar.

Haromdan ming tanga,
Haloldan bir tanga.

Haromzoda bugʼdoy koʼrsatib, arpa sotar.

Haromzoda suvdan holva pishirar.

Haromzodaning quyrugʼi — bir tutam.

Yangi kitoblar

Аxborot - resurs markaziga qabul qilingan yangi adabiyotlar.

  • Ishbilarmon kishilar

    Ishbilarmon kishilar

    Asli ismi Uilyam Sidney Porter (1862 - 1910) bolgan O'Genri dunyo adabiyotiga Amerikaning eng mashhur hikoyanavis adibi sifatida tanilgan. U o‘zining qisqa umri davomida sermahsul ijod qildi, uch yuzga yaqin hikoyalar yozib qoldirdi. Bu hikoyalarida O'genri Amerika hayotining rang-barang jibatlarini, inson qalbi va xarakterini turfa obrazlar timsolida turlicha bo‘yoqlarda mahorat bilan tasvirlab bera oldi. Aziz kitobxon! Mazkur kitobga kirgan O'genrining eng sara hikoyalari rus va ingliz tillaridan o’zbekchaga tarjima qilinib, hukmingizga havola etilmoqda. U sizlarga manzur bo’ladi degan umiddamiz.

    Read more

  • Gulliverning sayohatlari

    Gulliverning sayohatlari

    Jonatan Svift 1667- yil 30-noyabrda Irlandiyaning Dublin shahrida, o‘rtahol oilada dunyoga kelgan 1745-yil 19-oktabrda 77 yoshida Dublinda vafot etgan. U ingliz-irlandiya hajviy asarlar yozuvchisi, jamoatchi, faylasuf, shoir, jamoat arbobi sifatida tanilgan. Tirishqoq va mohir Jonatan Sviftning ko'pgina asarlari irlandiyaliklar tarafidan hurmat va ehtirom bilan qabul qilingan. Ayniqsa, uning ,,Gulliverning sayohatlari“ nomli mashhur fantastik asari keng ommaga tezda tarqaldi. Dunyoning ko‘pgina mamlakatlarida sevilib o‘qiladigan mazkur asar juda ko‘p marta ekranlashtirilgan. Kitob keng kitobxonlar ommasi uchun mo'ljallangan.

    Read more

  • Har kimki vafo qilsa

    Har kimki vafo qilsa

    O‘zbek xalqi ko'plab buyuk daholarga beshik tebratgan millat. O‘zbekning asl farzandi, shoh va shoir, zukko olim Zahiriddin Muhammad Bobur ana shunday daholardan biridir. U nafaqat o‘z diyorimizda, balki butun dunyoga ham ma’lum-u mashhurdir. Bobur tadbirkor podshoh, mohir sarkarda sifatida Boburiylar sulolasiga asos solgan bo‘lsa, iste’dodli shoir, adib sifatida adabiyot xazinasini o‘zining o‘lmas va sara asarlari bilan boyitdi. Bizgacha uning “Boburnoma”dan tashqari juda ko‘p g'azal, ruboiy, qit'a va fardlari yetib kelgan. Qo‘lingizdagi kitobda Bobur she’riyatining eng go‘zal namunalari jamlangan bo‘lib, unda insoniy fazilatlar, yor vasli, uning go'zalligi, unga cheksiz muhabbat, hijron azobi, ayriliq alamlari nihoyat go‘zal va mohirona ifoda etilgan.

    Read more

  • Shum bola

    Shum bola

    Asarda XX asrdagi xalqimizning turmush tarzi, ikkinchi jahon urushi ta’siri, o‘zbek xalqining azaliy urf-odatlari tasvirlangan. Aziz kitobxon, o'ylaymizki, siz ularni o‘qib, qalbingiz zavqqa to‘ladi, shu bilan birga, XX asr millat tumushidan xabardor bo‘lasiz. Asarni sabot bilan o'qing, xalqimiz tarixini, adabiyotini chuqur o’rganing, kerakli mushodalar chiqaring. Bu yo'lda sizga zafarlar tilab qolamiz.

    Read more

  • Mening o`g`rigina bolam

    Mening o`g`rigina bolam

    G‘afur G'ulom asarlarini o‘qir ekanmiz, unda oddiy xalq turmushi va ruhi bilan birga yashayotgan yozuvchi ko‘z o'ngimizda gavdalanadi. «Mening o‘g‘rigina bolam» nomi ostida jamlangan qissalar va hikoyalar o'zbekona hayot tarzi, insonlardagi mehr-oqibat kabilarning qimmatli ne’mat ekanligini anglaydi. Taqdir boshlagan ko'chalarning so‘qmoqlaridan bir-bir o‘tib, unda o‘z yaqinlarini ko'rgandek boladi. O'zbek xalqining necha asrlardan beri meros bo’lib kelayotgan urf-odatlari ichidan eng qadrlisi - mehmondo'st xalqni ko'radi. G‘afur G’ulom asarlarini sahna orqali tanigan kitobxon do'stlarimiz endi adib asarlarining asl mohiyati bilan tanishadilar.

Interaktiv xizmatlar

Buxoro davlat universitetining interaktiv xizmatlari.

O`JQQT

O`quv jarayonini qo`llab quvvatlovchi tizim

Moodle

Moodle masofaviy o`qitish tizimi

E-hujjat

Elektron hujjat aylanish tizimi