QALAMTASVIR - chiziqlar asosida grafika vositalari (qalam, pero, tush va b.) yordamida yaratiladigan tasvir, chizgi (q. Rasm). Tasviriy san`at, amaliy san`at va me`morlikda muhim o`rin tutadi: asarning asosi tekis yuza (qog`oz)da uning tasviri (tarhi)ni qalamda ishlash b-n boshlanadi. Q.da sof chiziqli va tonal rasmlar hamda har ikkisi biri-biri b-n qo`shilib borliqni real aks ettiradi. Q.da bo`lajak asarning tuzilishi, buyum va obrazlarni fazoda joylashishi, ko`rinish chegara chiziqlari, o`lcham va nisbatlari belgilab olinadi. Q. (chiziqli rasmlar va chiziqlar qorishmasidan hosil bo`ladigan tonal rasmlar, nursoyali hajmga ega bo`lgan tasvirlar) ishlashda qalamning nursiz va to`q qora tuslari hamda ular orasidagi tuslanishlardan unumli foydalanish orqali kerakli samaralarga erishiladi. Natura b- n tasvir o`rtasida to`la o`xshashlikka erishish uchun tasviriy san`atning ifoda vositalari (kompozitsiya, perspektiva, nursoya, proporsiya va b.)dan foydalaniladi. Asliga qarab tasvir ishlashda bilim va ko`nikma hosil bo`ladi. Q. mustaqil dastgoh san`ati (portret, manzara, natyurmort va b.) hamda qo`shimcha (yirik rangtasvir, haykaltaroshlik va b .da yordamchi) manba vazifasini o`taydi. Tonal rasmlarda chizilgan buyumlarning tuzilishi, fazodagi o`rni, yuzasining fakturasi, kuzatuvchiga, nisbatan yaqin yoki uzoqligini ham ko`rsatish mumkin.