BAYOT - 1) O`n ikki maqom tizimidagi muayyan sho``balar nomi (mas., Navro`zi Bayot, Bayoti Ajam); 2) Shashmaqomda Navo, Xorazm maqomlarida Navo va Dugoh maqomlari tarkibidagi sho``balar. 3) Toshkent-Farg`ona maqom yo`llarida besh qismli yirik ashula turkumi.

BADIHAGO`YLIK - erkin tarzda ijro etilgan yoki ijod qilingan badiiy asarning o`ziga xosligi. Muayyan shakl, janr, uslub va b.ning ijodiy tartib-qoidalari asosida, ya`ni mavjud elementlarning yangi tarzda o`zaro bog`lanishi natijasida vujudga keladi. Turli san`at turlari (teatr, raqs, musiqa, poeziya)da mavjud. Ijodkorlardan yuqori mahorat, badiiy saviyani talab qiladi.

BADIHAGO`Y - q. Baxshi.

BADIHA - xalq og`zaki ijodi an`analari asosida tuyqusdan, birdaniga aytilgan so`z, she`r yoki qo`shiq. Jahon xalqlari ijodida uchraydi. Muayyan asarni ijro yoki qayta ijro etganda ijodkorning unga kiritgan ijodiy o`zgartishlari.

BADIK - folklor janri. Gul, gulafshon, ko`ch-ko`ch deb ham yuritiladi. Kishi tanasiga qizilcha, eshak-em va b. toshmalar toshganda, go`yo ularni daf etish uchun badikxon (badik aytuvchi)lar tomonidan ijro etilgan.

BADIIY HAVASKORLIK - asosiy ishdan ajralmagan holda jamoa (to`garak, studiya, xalq teatrlari) yoki yakka holda (xonanda, badiiy so`z ustasi, sozanda, raqqosa, akrobat va b.) ijod qilish; xalq ijodi shakllaridan.

BADIIY O`QISH - estrada san`atining bir turi: adabiy asar (she`riy nasr, shuningdek publitsistika) yoki dramatik parchani omma oldida ijro etib, tinglovchilarga asar mohiyatini badiiy ta`sirchan qilib yetkazish. O`tmishda B. o`. xalq baxshilari, ertakchilar, qiziqchilar ijodining asosi hisoblangan.

BADIIY SO`Z USTASI - adabiy asar (she`r, nasr, shuningdek publitsistika) yoki dramatik parchani teleko`rsatuv va radio orqali, estrada, sirk va filarmoniya sahnasida ifodali o`qib, ular mazmunini tinglovchilarga badiiy ta`sirli qilib yetkazuvchi ijrochi, estrada va filarmoniya artisti.