BADIIY SANOAT- maishiy muhitni bezash uchun xizmat qiladigan amaliy bezak san`ati buyumlari (kiyim, mato, gilam, mebel, badiiy shisha, chinni, zargarlik buyumlari va h. k.)ni sanoat usulida tayyorlash.

BADIIY MUZEYLAR - tasviriy va amaliy bezak san`ati hamda me`moriy yodgorliklarni yig`ish, saqlash, ta`mirlash, saralash, ko`rgazmalarda namoyish etish, o`rganish, targ`ib etish b-n shug`ullanadigan, san`atshunoslik yo`nalishidagi ilmiy ma`rifiy va tadqiqotlar olib boriladigan muassasalar.

BADIIY KO`RGAZMALAR DIREKSIYASI, Badiiy ko`rgazmalar va panoramalar direksiyasi - muzey maqomiga ega bo`lgan mustaqil ijodiy ishlab chiqarish muassasasi.

BADIIY KO`RGAZMALAR - san`at asarlarini ommaviy namoyish etish shakli. Ko`rgazma maxsus qurilgan yoki moslashtirilgan binolar (mas., muzey, madaniyat saroylari zallarida, teatr, kinoteatr, jamoat binolari foyelarida va sh.k. joylar)da uyushtiriladi.

BADIIY BUYUMLAR - chiroyli shakllarda bezatib ishlangan, turli maqsadlarda foydalaniladigan nafis buyum va zeb-ziynatlar. Uy-ro`zg`or anjomlari, kiyim- kechak, mehnat qurollari, badiiy gazlama, gilam, palos, so`zana, qurol-aslaha, mebel kabi moddiy madaniyat asarlari, tasviriy san`at, amaliy san`at, bezak san`ati mahsulotlarini o`z ichiga oladi. Ba`zi mamlakatlar o`z B.b.i b-n mashhur (xitoy chinnisi, eron gilami, hind fil suyagi mahsulotlari, chex shishasi, o`zbek atlasi va b.). Jamiyat taraqqiyoti B. b. tayyorlash usuli (haykaltaroshlik, kulollik, zargarlik, miskarlik, degrezlik, naqqoshlik, o`ymakorlik, koshinkorlik va b.)ni ham takomillashtirdi, badiiy hunarmandlikning yangi sohalari (kashtado`zlik, do`ppido`zlik, zardo`zlik, shishasozlik va b.)ni yuzaga keltirdi. O`zbekiston hududida B. b. ishlab chiqarish 20-a.ning 20-y.laridan keng yo`lga qo`yila boshlandi. 60-y.lardan mazmunan boyidi, turlari ko`paydi; an`anaviy B. b. qardosh xalqlar yaratayotgan mahsulotlar hisobiga ham boyimokda.

ASHULACHI - ashulani ijro etuvchi yetuk san`atkor, xonanda, hofiz. A. ovoz imkoniyatlarini egallash, ulardan to`liq foydalana bilish, ashula yo`llarini o`rganishda yuksak malaka hosil etish b-n yetishadi. A.ning ovozi, ijro uslubi (ishkamiy, binigiy, gulligiy) turlicha bo`lishi mumkin.

ASHULA YO`LI - 1) cholg`u kuylarining ashula yo`llari; 2) O`zbekistonning turli joylarida hofizlik maktablariga xos ijrochilik-ijodchilik an`analari. Mas., Buxoro-Samarqand A.y.lari, Xorazm A.y.lari, Farg`ona-Toshkent A.y.lari va h.k.; 3) atoqli hofizlarning ijrochilik-ijodchilik uslubiga xos asarlar. Mas., Ushshoqi Hoji I - II (Hoji Abdulaziz Abdurasulov talqinida tanilgan Ushshoq yo`llari).

ASHULA VA RAQS ANSAMBLI - turli tarkibda tashkil topgan sozanda, xonanda va raqqoslar guruhi.