ANShLAG (nem. anselag) - opera, balet, umuman sahna asarlarida, konsertlarda hamma biletning sotilishi, zalning to`la bo`lishi.

ANTRAKT - 1) spektakl pardalari, konsert va sirk tomoshalarining bo`limlari orasidagi tanaffus; 2) teatrda ikkinchi va undan keyingi pardalar boshlanishi oldidan chalinadigan musiqali muqaddima.

ANTIK TEATR - yunon teatri va uning ta`sirida rivojlangan ba`zi (ellin madaniyati ta`siridagi) Sharq mamlakatlari teatri hamda Qadimgi Rim teatrini umumlashtiruvchi tushuncha.

ANSAMBL (fans.ensemble, andare - birgalikda) - vokal yoki cholg`u musiqa asarining bir necha ijrochi tomonidan ijro etilishi. Bir guruh artistlarning bir butun badiiy jamoa holida chiqishi. Uncha katta bo`lmagan ashulachi (vokal) yoki cholg`uchi (sozanda)lar jamoasi uchun yaratilgan musiqa asari. Ijrochilar soniga qarab, bu ansambllar turlicha ataladi. Spektakldagi oliy maqsadni ro`yobga chiqarish yo`lida aktyorlar va boshqa ijodkorlarning badiiy ijodiy yaxlitligi ham A. deb yuritiladi.

ANONS (frans. annonce - ommaviy axborot, e`lon) - spektakl haqida oldindan beriladigan e`lon.

ANDANTE (ital. andante, andare - bormoq, yurmoq) - o`rtacha tezlikda bo`lgan sur`at ko`rsatkichi. Shoshmasdan, osoyishta ijro etiladigan sur`at.

AMFITEATR (yun. amphitheatron - ikki tomonlama tomosha) - 1) qad. YUnoniston va Rimda ommaviy tomoshalar, teatr spektakllari ko`rsatiladigan mahobatli bino, o`rtasidagi maydoni ellips shaklidagi ulkan inshoot; uning tomoshabinlar uchun mo`ljallangan qator-qator o`rindiqlari pastdan yuqoriga zina shaklida ko`tarilib boradi. A.da arklar, ustunlar va ular orasida gumbazli galereyalar bo`lgan. 2) tomosha zali (teatr, sirk)dagi yarim doira shaklida qiya ko`tarilib boruvchi o`rindiqlar.

AMPLUA - aktyorning shaxsiy imkoniyati va sahnadagi ijrochilik qobiliyatiga juda mos tushadigan rollar tipi. Mas., tragik, komik rollar va h.k.