Geografik atamalar (1685)
Abiogen omillar - geografik qobiq va landshaftlarning anorganik omillari.
Abiogen landshaftlar - asosan abiogen komponentlardan tashkil topgan, ya`ni biogen komponentlar (o`simlik va hayvonot dunyosi hamda mikroorganizmlar) ishtirokisiz paydo bo`lgan landshaftlar. Hozirgi abiogen landshaftlarga Antarktidaning markaziy qismlari va Grenlandiyaning muz qalqonidagi, shuningdek Himolay va boshqa eng baland tog`larning chuqqilaridagi landshaftlar kiradi. Abiogen landshaftlar asosan hayotsiz bo`lsada, unda biosfera mahsulotlari - atmosfera kislorodi, ohaktoshlar va boshqa cho`kindi jinslar bor. Oy landshaftlari ham abigen landshaftdir.
Abiogen komponentlar - Yer po`sti, havo va suv geografik qobiq hamda landshaftlarning abiogen (noorganik) komponentlarini tashkil etadi.
Abiogen bosqich - geografik qobiq paydo bo`lishi va rivojlanishining organik hayotsiz ilk bosqichi. Geografik qobiq o`z rivojlanishi davomida abiogen bosqichdan biogen bosqichga, so`ngra esa, inson paydo bo`lgach, antropogen bosqichga o`tgan. Abiogen bosqich geografik qobiq taraqqiyotining paleozoy erasigacha bo`lgan davrini o`z ichiga oladi. U tobiogen (dobiogen) bosqich ham deb ataladi.
Abadiy muzloq yer - mangu tung yer; Ko`p yillik muzloq yer, doimiy muzloq yer.